Pasmajärven aallot – taidenäyttely

Lapsuuen aikhaisheen asumaympäristhöön kuulu järvi.
Pasmajärvi.
Järvi oli osa sen aikhaista ajanviettopaikkaaja leikkiympäristöä.
Minun lapsuuen aikhaan ko ei ollu tietoakhaan päiväkoista, televisioista eikä kännyköistä niin net korvas silloin omalta osalthaan tämä järvi.

Touhusimma järvelä vaikka mitä naapurin tai muitten kylän kläpitten kans.
Joskus kävimä järvelä onkimassa, kokemassa katiskoita tai seku vain sielä soutelemassa jonku venheelä.
Joskus taas olthiin järven rannala kurpomassa niin että saatto joitaki vaaratilantheitaki sattua. Mutta ei sielä vain kukhaan koskhaan kuitekhaan itteänsä hukittennu. On siinä häätyny olla kyllä hyyää tuuriaki matkassa.
Kyllä ei tänä päivänä sais hulliaiset kläpit olla nuin itteksheen järvelä ko silloin. Tulis kyllä lastensuojeluviranomaset ja ottas huosthaan.

Kaikista sen aikhaisista touhuista on jääny miehleen maisemakuvia jokka nyt yli kuuenkymmenen vuen päästä haluan tua esile tällä näyttelyllä.

Pasmajärvi on kyllä komea järvi. Ei sitä lapsena eikä kyllä vielä vanhempanakhaan huomanu että meilä on semmonen Pasmajärvi-aare olemassa.
Sielä on iso järvensölkä, saaria, niemiä, lahtia ja yks varhmaan kaikhein arvokhain kaikista eli Tirroniemi.
Son poka kyllä erikoista tte semmonen hiekkaranta on sielä. Sanokaapa mistä muualta löytyy tämmönen maisemakauhneus!

No sitte varsinainen asia elikkä näyttely.

Suuriman osan töistä olen piirtäny suohraan mallista.
Koska puuväritten jälki on melko haileata niin olen käyttäny jonku verran väritten syventämisessä apuna nykytekniikkaa. Kaikki kuvat olen kuitekki tehny omin käsin viimistä piirtoa myöten.

Tässä vielä kiitokset kaikile niile jokka on lähettänheet mulle kuvia järvestä tai olheet muuten vain apuna tämän näyttelyn suunittelussa ja totteutuksessa.

Kiitokset Kyösti, Sirpa, Anneli, Tuomo, Arja, Jyrki, Lenna, Erkki, Mauri ja Sakke.
Kevhään alussa 2021

Oiva Pasma

Miltäs nuo kuvat sinusta näyttävät?
Jos halvaat sanoa jotakin näistä kuvista tai muuten vain kysellä jotaki niin tässäpä sulle osote:

pasmaoiva(at)gmail.com